Us Heimatbund kann ok 2005 wedder up een Jahr mit vääle Veranstalten tröög kieken. 22 Fortbildungs- un Warkeldaag, darto de SPIEKER-Dag un de 26. SPIEKER-Abend sind up de Been stellt wurrn.

De Schrift van us Symposion "Plattdeutsch in der Schule" hebbt wi in't AGO Ole Gymnasium Ollnborg vorstellt. Dat ersde Book kunnen wi darbi Herrn Staatssekretär Hartmut Saager van dat Ministerium für Wissenschaft und Kultur, Hannover, persönelk övergäven. De Mitveranstalter van dat Symposion, Dat Institut för nedderdüütsch Spraak Bremen un de Oostfreeske Landschupp, weern mit darbi.

SPIEKER-Baas Jürgen Hennings weer in'n Maimaand van den NDR, bi de Pries-övergaav van "Verteil doch mal" een Priespatenschupp to övernehmen. Ut meist 3.000 plattdüütsche Bidrääg to dat Thema "Wat 'n Malöör" weern de besten 25 Geschichten-Schriever in't Ohnsorg-Theater Hamborg inlaadt. Us Mesterkring-Baas Detmar Dirks weer mit unner de besten 25. 5 Autoren hebbt 'n Pries krägen, un den dritten Pries hett Jürgen Hennings övergäven.

Bi dat 1. Landeskulturfest in Ollnborg weer us Heimatbund an beide Daag mit siene Lüe verträen. Mit darbi weern de Danzkoppels ut Ollnborg, Bösel, Bad Twüschenahn, Jeddeloh, Ocholt un ut n Saterland. Van'n Schrieverkring hebbt Autoren leest: Annedore Christians, Erhard Brüchert, Dr. Jutta Engbers, Rita Gnep, Inge zur Horst, Matthias Huber, Ingeborg Huisken, Annegret Neunaber, Hermann Reents, Albert Rüschenschmidt un Gretel Scheier. Plattdüütsch Kark in St. Lamberti Ollnborg mit Bischof Peter Krug un Pastorin Bärbel Bleckwehl, darto Tobias Götting an de Orgel un de Karkenchor Karkhatten unner dat Leit von Heide Grotelüschen. Un dennso harrn wi noch plattdüütsch Singkoppels up de Bühn an'n Slottplatz stellt: den Cloppenborger Kinnerchor, den gemischten Chor Ocholt, de Ihorster Dörpshuusspäler un de lüttjen "Dorfspatzen" ut Wiesede. All weern best tofräen, de Mitmaakers, de Tokiekers, un de Sünn hett ok lacht.

In'n Septembermaand weer de Heimatbund wedder ünnerwägens: at Vertreter van Neddersassen bi de ersden Norddüttschen Daag van'n Landesheimatverband Mecklenburg/Vorpommern in de Reuterfestung Dömitz an de Elv. De SPIEKER-Baas hett för dat Land Neddersassen de Grööten överbrocht. Mecklenburg/ Vorpommern, Schleswigholstein, Neddersassen un Hamborg weern verträen. Van us Schrieverkring sünd Schrieverkring-Baas Albert Rüschenschmidt un de Nawuss-Autor Matthias Huber mit ehr Geschichten allerbest in de grode Runn van Deelnehmers ut de veer Länner ankamen.

Vääl Arbeit in Insatz hett de Vorstand dör dat heele Jahr leist för dat eegens van't Ministerium al toseggte Inrichten van een Nedderdüütsch-Lehrstohl för Lehrer-Utbilden an de Uni Ollnborg. Wat dar nu to'n Enn bi rutsuurt, dat weet 'n jümmers noch nich. Wi hebbt all groden Vereene un Verbände in Gang brocht und doon, wat wi kunnen.

De 12 lüttjen Theaterstücken, de bi dat Theater-Schriev-Seminar 2004 van junge Lüe ut de Theaterscholen Neeborg un Braak schräven wurrn sünd, hett

Detmar Dirks dörkäken un to'n Druck herricht'. An`n 18. in`n Dezembermaand sünd de Kortjans in een Potpourri van een Deel van de Jung-Autoren in de Nedderdüütsch Bühn Neeborg vorstellt wurrn, un de jungen Lüe hebbt sik bannig freit över de moien Bööker. NDR un Fernsehen 0L weern ok kamen. All Ollnborger Haupt- un Realscholen un Gymnasien hebbt van'n SPIEKER een Book "Theater för junge Lü“  för ehr Arbeit för Plattdüütsch schunken krägen.
Dat Book is in'n Hannel unner ISBN 3-89995-253-7.

De SPIEKER Ehrennadel in Sülver hebbt dit Jahr krägen för ehr War k för plattdüütsch Woort un nedderdüütsch Aart:

1.)   Friedrich Wilhelm Henning Baas van'n Heimatvereen Ocholt-Howiek

2.)   Herbert Schröder, Späälbaas un 2. Baas van'n Heimatvereen Wechloy.

Annedore Christians van'n Schrieverkring is mit dat "Verdienstkreuz am Bande des niedersächsischen Verdienstordens" utteekent wurrn, un de Literaturpries van Plattfoss 2005 gung an
1. Heinrich Siefer, 2. Maria von Höfen, Schrieverkring, un 3. Helga Hürkamp, Schrieverkring. De SPIEKER graleert van Harten.

Bi'n 32. Singkring-Dag in Jever hett Singkring-Baas Anton Günter Wempe, Ollnborg, wieldat em dat van`t Oller her to vääl wurd, sien Amt togäven. Na 13 Jahr at Singkring-Baas hett Jürgen Hennings em verafscheedt. De Heimatbund dankt em van Harten för sien Wark. 'n Nafolger ward söcht. Kiekt Jo ok is mal mit um!

Siet den 41. Warkeldag 1979 harr Detmar Dirks dat Leit van'n Mesterkring inne Hannen. An'n 95. Mesterkring-Dag harr he sik Rita Kropp un Edzard Pauly (Baas van de Lehrer-AG Ammerland) at Helpslüe to Siet stellt un an'n 103. Warkeldag in'n Novembermaand 2005 het Detmar Dirks dat Wark heel un deel an Rita Kropp afgäven. Ehr to Siet staht bi dat Leit van'n Mesterkring nu Elfriede Coburger Christina Büsselmann un Edzard Pauly. - An Detmar Dirks hett de SPIEKER Dank to seggen för de Bööker "Snacken un Verstahn I un II", "Hilfen für den Plattdeutsch-Unterricht", "Leesbook för Schulen", "Platt vandaag - Vermaak an Spraak II" un "Theater för junge Lü".

De Termine 2006 hebbt wi up'n extra Zädel upschräven, schrievt de man foorts in Jo'n Kienner in.

För us Vereene is goot to weeten, dat dat bi de Finanzämter een Book gifft "Steuertipps für Vereine - Niedersachsen" för 3,00 Euro Schutzgebühr. Herausgeber: Nieders. Finanzministerium, Referat für Presse- und Öffentlichkeitsarbeit, Schiffgraben 10, 30159 Hannover. Dar geiht dat um: Gemeinnützigkeit, Besteuerung von Vereinen - Welche Steuerarten kommen für Vereine in Frage - Spendenabzug.

Denkt dar an, wenn sik Adressen, Lü un/of Konten bi Jo ännert, dennso geevt foorts Naricht an Karin Schuberack, Donnerschweer Str. 159 A, 26123 Ollnborg, Tel: 0441/883404.

Jo all mitn'anner ok in`t Jahr 2006 vääl Vermaak an dat Wark för Heimat un Moderspraak!

Jo

SPIEKER-BAAS

Jürgen Hennings